Yrkja – Tónverkamiðstöð og Sinfóníuhljómsveit Íslands kalla eftir umsóknum um þátttöku í Yrkju

Yrkja er starfsþróunarverkefni Tónverkamiðstöðvar fyrir tónskáld. Verkefnið parar saman valin tónskáld úr ólíkum áttum við úrval íslenskra listastofnanna. Á þessu starfsári fá tónskáld tækifæri til að vinna með Sinfóníuhljómsveit Íslands, Jaðarberi tónleikaröð og Nordic Affect. Hér er auglýst eftir umsóknum um þátttöku í verkefni með Sinfóníuhljómsveit Íslands.

Markmið Yrkju er að veita hagnýta reynslu sem getur orðið að hornsteini í ferli tónskáldsins. Verkefnið er fyrir tónskáld á fyrri hluta starfsævi sinnar, það brúar bilið milli háskólanáms og starfsferils. Verkefnið undirbýr tónskáld fyrir vinnu í faglegu umhverfi hjá stærri hljómsveitum, hátíðum og öðrum listastofnunum hérlendis og erlendis. Þátttaka í verkefninu getur haft áhrif á tónskáldið hvað varðar þróun hæfileika, listrænan metnað, starfsreynslu og tengslamyndun í tónlistargeiranum.

Tónverkamiðstöð og Sinfóníuhljómsveit Íslands bjóða upp á tækifæri fyrir að hámarki þrjú tónskáld til að eyða níu mánuðum með hljómsveitinni, þar munu þau þróa færni sína í að skrifa fyrir hljómsveit og frumflytja ný verk. Tónskáldin munu fá innsýn inn í innra starf hljómsveitarinnar, vinna náið með hljóðfæraleikurunum, Daníel Bjarnasyni tónskáldi og hljómsveitarstjóra, skrifstofu og yfirstjórn SÍ. Þetta níu mánuðaða ferli mun fela í sér m.a. tvær tónskáldastofur og tónleika.

Áhersla er lögð á ferli listsköpunar og munu þátttakendur í Yrkju verða hvattir til að þróa hugmyndir sínar og aðferðir við sköpun. Við viljum hlúa að starfsferli tónskáldanna og mun því verkefnið fela í sér ráðgjafaviðtöl í Tónverkamiðstöð um starfsferil tónskáldins og mun miðstöðin skipuleggja fund þar sem tónskáldin í verkefninu hittast og deila reynslu sinni af verkefninu og skiptast á hugmyndum.

Hlaða niður umsóknargögnum og nánari lýsingu á verkefninu